Turikiya yamuritse ‘Yildirimhan’: Misile yambukiranya imigabane ishobora kurasa mu ntera ya Km 6000

 

Mu imurika mpuzamahanga ry’intwaro rya SAHA ryabereye i Istanbul kuri uyu wa 6 Gicurasi 2026, Turikiya yerekanye bwa mbere umushinga wayo w’ikoranabuhanga ruhanitse w’intwaro yambukiranya imigabane (ICBM) yiswe Yildirimhan.

 Iyi misile ifite ubushobozi bwo kurasa intego iri mu ntera ya kilometero 6,000, ikaba ishobora kugera mu bice byose bya Asia, u Burayi, ndetse na Afurika.

Ikoranabuhanga ridasanzwe 

Iyi ntwaro ikomeje gutigisa isi mu bijyanye n'ubwirinzi, ifite ibiranga ikoranabuhanga rigezweho:

• Umuvuduko: Ishobora kugenda ku muvuduko ukubye inshuro 25 uw’ijwi (Hypersonic speed).

• Ingano y'umutwaro: Ishobora gutwara intwaro n’ibikoresho bifite ibilo 3,000 mu gice cyayo cy’imbere.

• Moteri: Ifite moteri enye (four-stage engine) ziyifasha kugera kure mu kirere no kugumya umuvuduko.

Turikiya mu bihugu bike ku isi 

Kugaragaza ubu bushobozi bishyize Turikiya mu gatsiko k’ibihugu bicye cyane ku isi (bitarenga umunani) bifite ikoranabuhanga rya ICBM, birimo u Burusiya, Amerika, u Bushinwa, na Koreya ya Ruguru. 

Minisitiri w’Ingabo, Yasar Guler, yashimangiye ko ubu bushobozi bugamije gufasha abafatanyabikorwa ba Turikiya kwicungira umutekano mu buryo burambye binyuze mu kubaha ikoranabuhanga aho kubaha intwaro gusa.

Abasesenguzi bagaragaza ko iri koranabuhanga rifitanye isano ya hafi n'imishinga yo kohereza ibyogajuru mu kirere (Space program), ibyo uyu munsi Turikiya imazemo gutera intambwe ishimishije.