Africa CEO Forum 2026: U Rwanda rwasinyanye amasezerano y’ishoramari rikomeye mu mashanyarazi n’inganda

 

Inama ya Africa CEO Forum ikomeje kubera i Kigali, yagaragaje ko ari urubuga rw’ishoramari rishingiye ku bikorwa bifatika. 

Ku munsi wa mbere w’iyi nama ihuje abayobozi barenga 2,800, u Rwanda rwasinyanye amasezerano y’ubufatanye n’ibigo bikomeye bigiye gushora imari mu nzego z’amashanyarazi, amahoteli, n’ubwikorezi.

Ishoramari rya Elsewedy Electric mu Rwanda 

Rimwe mu masezerano akomeye yitezweho impinduka ni ayasinywe hagati y’Urwego rw’Iterambere mu Rwanda (RDB) n’ikigo cy’Abanyamisiri, Elsewedy Electric. Iri shoramari rishingiye ku mishinga ine y’ingenzi:

• Uruganda rw’ikoranabuhanga: Gukora mubazi z’amazi n’amashanyarazi zigezweho (smart meters), ibyuma byongera umuriro mu modoka zikoresha amashanyarazi, n’ibyuma bya transformateur.

• Uburezi: Gushyiraho kaminuza cyangwa ishuri rikuru ry’imyuga n’ubumenyingiro (TVET).

• Ubwikorezi: Gushyiraho icyanya cy’ubwikorezi n’ububiko (logistics hub).

• Inganda: Gucunga no guteza imbere icyiciro cya mbere n’icya kabiri by’Icyanya cy’Inganda cya Kigali (KSEZ).

Elsewedy Electric ni kigo ki? 

Ni ikigo cy’indashyikirwa ku rwego mpuzamahanga gifite abakozi 19,000 n’inganda 34 muri Afurika na Aziya. 

Mu mwaka wa 2025, iki kigo cyinjije arenga miliyari $5.7, kikaba cyohereza ibikoresho byacyo mu bihugu 110 ku isi. 

Mbere y’isinurwa ry’aya masezerano, Perezida Paul Kagame yari yakiriye Ahmed Elsewedy, baganira ku kwagura ishoramari rishingiye ku ngufu zitangiza ibidukikije.

Andi masezerano yasinywe 

Uretse Elsewedy Electric, u Rwanda rwasinyanye andi masezerano n’ibigo bitandukanye birimo:

• APIEX (Bénin) mu guteza imbere ishoramari.

• Sunrise Resorts & Cruises na Lux Collective mu rwego rw’amahoteli n’ubukerarugendo.

• RSSB, Busara Advisors Inc, na Cleo Capital Group.