Minisitiri w’Intebe wa Israel, Benjamin Netanyahu, yasheshe akanama Kari gashinzwe intambara, nyuma yuko bamwe muri bo bamwigumuyeho.

Minisitiri w’Intebe wa Israel, Benjamin Netanyahu, yasheshe guverinoma ishinzwe intambara yari igizwe n’abaminisitiri batandatu, nk’uko umuyobozi muri Israel yabitangaje kuri uyu wa Mbere ushize, mu gikorwa cyari gitegerejwe na benshi nyuma y’uko umwe mu bo bahanganye bakomeye, uwahoze ari jenerali, Benny Gantz, yeguye muri guverinoma yo mu bihe bidasanzwe.

Uyu muyobozi nk’uko iyi nkuru dukesha NBCNews yagize ati: Netanyahu yamenyesheje abaminisitiri ko azagirana nabo inama ngishanama mu ihuriro rito ryiswe “the kitchen cabinet.”

Netanyahu yari yasabwe na ba minisitiri bo mu ihuriro rye, barimo Minisitiri w’imari, Bezalel Smotrich na Minisitiri w’umutekano w’igihugu, Itamar Ben-Gvir, kwinjizwa muri iyi guverinoma ishinzwe intambara, ibintu ngo byari kongera umwuka mubi n’abafatanyabikorwa mpuzamahanga, barimo Amerika.

Iri huriro ryashinzwe nyuma y’uko Gantz yiyunze kuri Netanyahu muri guverinoma y’ubumwe bw’igihugu mu ntangiriro z’intambara nyuma y’uko Hamas igabye igitero kuri Israel ku itariki ya 7 Ukwakira 2023. Iri huriro kandi ririmo umufatanyabikorwa wa Gantz, Gadi Eisenkot na Aryeh Deri, ukuriye ishyaka Shas rishingiye ku idini, nk’indorerezi.

Mu cyumweru gishize, Gantz na Eisenkot bavuye muri guverinoma kubera ibyo bavuze ko ari ukunanirwa kwa Netanyahu kugaragaza uburyo azakoresha ngo atsinde intambara, ubu igeze mu kwezi kwa munani.