Ikipe ya Gatoto FC, yatsinze Brésil & Friends ibitego 3-2 kuri final ya “Pre-Season Agaciro Tournament”

Ikipe ya Gatoto FC, yatsinze Brésil & Friends ibitego 3-2 ihita yegukana igikombe cy’irushanwa rya “Pre-Season Agaciro Tournament” ku nshuro ya Kabiri.

Kuri uyu wa Gatandatu tariki ya 22 Kamena, ni bwo hasojwe Irushanwa rya “Pre-Season Agaciro Tournament 2024.”

Irushanwa ry’uyu mwaka, ryari ryitabiriwe n’amakipe 16 yari agabanyije mu matsinda ane. Muri buri tsinda, hazamukaga amakipe abiri ya mbere yahitaga abona itike ya 1/4.

Umukino wa nyuma w’iri rushanwa, wabareye kuri Stade Mumena, uhuza Gatoto FC itozwa na Mucyo Antha na Brésil & Friends yiganjemo abavuka i Rubavu.

Ab’i Rubavu babanje kwiharira umukino, bituma ku munota wa 17 babona igitego cyatsinzwe na Sibomana Sultan uzwi nka Bobo.

Gatoto yahise iba nk’ikangutse ndetse itangira gusatira ishaka kwishyura igitego yari itsinzwe hakiri kare.

Gusa Brésil & Friends yakomeje gucunga igitego cya yo kugeza iminota 45 y’igice cya Mbere irangiye.

Bakigaruka mu gice cya Kabiri, Gatoto FC yagarutse yahindutse ndetse itangira gusatira ishaka igitego cyo kwishyura.

Ikipe ya Brésil & Friends, yahise ibona igitego cya Kabiri ku munota wa 65 na cyo cyatsinzwe na Sibomana Sultan.

Byahise bihindura isura kuri Gatoto FC ndetse ihita ikora impinduka, yinjiza Kevin Ebene wasimbuye Nsanzimfura Keddy.

Ebene akijyamo, yahise atsinda igitego ku munota wa 67 ku mupira yatereye kure maze uruhukira mu rushundura.

Gatoto yahise ibona ko byose bishoboka ndetse ikomeza gusatira biciye kuri Chukwuma na Mugisha Didier.

Ibintu byongeye kuba byiza kuri iyi kipe itozwa na Antha, ku munota wa 72 ubwo Mugisha Didier yatsindaga igitego cya Kabiri cyari kiyigaruriye icyizere cyo kuba yanatsinda umukino.

Brésil & Friends, yahise icika intege, bituma iyo bari bahanganye yongera imbaraga.

Ibintu byongeye kuba byiza kuri Gatoto FC, ku munota wa 80 ubwo Rafael Osaluwe yatsindaga igitego cya Gatatu cyanayihesheje igikombe.

Umukino waje kurangira Gatoto FC yegukanye igikombe ku ntsinzi y’ibitego 3-2. Yari inshuro ya Kabiri iyi kipe yegukana iri rushanwa.

Ikipe ya Mbere yahembwe imidari ya Zahahu, igikombe ndetse na miliyoni 1 Frw. Iya Kabiri yehembwe ibihumbi 500 Frw.

Munyeshyaka Makini uyobora “Pre-Season Agaciro Tournament 2024”, yavuze ko yishimira uko Irushanwa ryagenze ndetse ashimira buri umwe wabigizemo uruhare.

Rafael Osaluwe yahembwe nk’uwatsinze ibitego byinshi, mu gihe Ntirushwa Aimée yabaye umukinnyi mwiza w’irushanwa.

Umutoza mukuru wa Gatoto FC, Biganiro Mucyo Antha, yabaye umutoza mwiza w’irushanwa.