Shampiyona y’u Bwongereza 2025/26: Abakinnyi n’abatoza ba Arsenal na Man City bihariye urutonde rw’abahatanira ibihembo

 

Shampiyona y’u Bwongereza (Premier League) yashyize hanze urutonde rw’abakinnyi n’abatoza bitwaye neza mu mwaka w’imikino wa 2025/26. 

Mu gihe habura imikino ibiri gusa ngo shampiyona isozwe, Arsenal iyoboye urutonde n’amanota 79 naho Manchester City ikayikurikira n’amanota 77, ari na byo byatumye amakipe yombi yihariya imyanya myinshi mu bahatanira ibihembo.

Abakinnyi b’umwaka bahataniye igihembo gikuru 

Arsenal ifite abakinnyi batatu bahatanira igihembo cy’umukinnyi mwiza w’umwaka:

• David Raya: Umunyezamu umaze gukina imikino yose ya shampiyona, akaba amaze imikino 18 atinjizwa igitego (clean sheets).

• Gabriel Magalhães: Inkingi ya mwamba mu bwugarizi bwa Arsenal bwagejeje imikino 36 bwinjijwe ibitego 26 gusa.

• Declan Rice: Yakinnye iminota 3009, arema uburyo bwo gushaka ibitego bugera kuri 63.

Ku ruhande rwa Manchester City, abahatana ni Erling Haaland ushaka iki gihembo ku nshuro ya gatatu akaba ari na we uyoboye abatsinze ibitego byinshi (26), hamwe na Antoine Semenyo watsinze ibitego 16 kuva yagera muri iyi kipe avuye muri Bournemouth. 

Abandi barimo Bruno Fernandes (Man Utd) watanze imipira 19 yavuyemo ibitego, Igor Thiago (Brentford) watsinze ibitego 22, na Morgan Gibbs-White wa Nottingham Forest.

Abakiri bato n’abatoza 

Mu cyiciro cy’abakinnyi bakiri bato, Manchester City (Nico O’Reilly na Rayan Cherki) na Bournemouth (Eli Junior Kroupi na Alex Scott) zifitemo abakinnyi babiri buri imwe. Abandi ni Kobbie Mainoo, Mateus Fernandes, Lewis Hall, na Michael Kayode.

Mu batoza, ihiganwa rikomeye riri hagati ya Mikel Arteta (Arsenal), Pep Guardiola (Man City), Michael Carrick (Man Utd), Andrews (Brentford), Le Bris (Sunderland), na Andoni Iraola (Bournemouth).