Israel yatangiye iperereza ku musirikare wafotowe "atamika itabi" ishusho ya Bikira Mariya muri Liban

 

Igisirikare cya Israel (IDF) cyatangaje ko cyatangiye iperereza rikomeye ku myitwarire y’umwe mu basirikare bacyo, nyuma y’uko hagiye hanze amafoto agaragaza uyu musirikare akora igikorwa cyo gusuzugura ishusho ya Bikira Mariya mu gace ka Debel muri Liban.

Uko byagenze n'aho byabereye 

Amafoto yasakaye ku mbuga nkoranyambaga ku wa Gatatu, tariki 6 Gicurasi 2026, yerekana umusirikare afite itabi mu kanwa, ari nako afite irindi mu kiganza aryerekeza ku munwa w’ishusho ya Bikira Mariya bimeze nko kuyitamika. 

Amakuru avuga ko ibi byabereye mu cyaro cya Debel giherereye mu Majyepfo ya Liban, kikaba gituwe cyane n’Abakirisitu.

Ukurakara kw’Abakirisitu n’icyemezo cya Israel 

Iki gikorwa cyamaganywe cyane n’abayoboke ba Kiliziya Gatolika n’Abakirisitu muri rusange, bafata Bikira Mariya nk’umubyeyi w’Indatwa. Mu itangazo rya IDF, yavuze ko imyitwarire nk’iyi iteye isoni kandi inyuranyije n’indangagaciro z’igisirikare, yizeza ko uyu musirikare azashyikirizwa ubutabera.

Ibi bije bikurikira ibindi bikorwa bimeze nk’ibi, aho undi musirikare wa Israel aherutse kugaragara yangiza ishusho ya Yezu, ibintu bikomeje gukongeza umwuka w’urwango n’ubushyamirane bushingiye ku myemerere muri kariya gace k’Uburasirazuba bwo hagati.