Impinduka zikomeye: FERWAFA yatanze miliyoni 464 Frw y’ibihembo by’umwaka w’imikino wa 2025/26

 

Isanduku y’ibihembo mu mupira w’amaguru mu Rwanda yakubise isuka! Ishyirahamwe ry’Umupira w’Amaguru mu Rwanda (FERWAFA) ryashyikirije amakipe yitwaye neza mu marushanwa yacyo igiteranyo cya miliyoni 464 Frw. 

Ibi ni ibirori n'amateka mashya kuko ubu hahembwe amakipe umunani ya mbere muri shampiyona, mu gihe ubusanzwe hahembwaga ikipe ya mbere gusa yatahaga ifite miliyoni 25 Frw.

Iki gikorwa cyabereye kuri FERWAFA Accommodation Facility i Remera ku mugoroba wo ku wa Gatanu, tariki ya 5 Kamena 2026.

Uko ibihembo bishize byagabanyijwe mu byiciro by'ingenzi:

• BK Pro League (Icyiciro cya Mbere mu Bagabo): Hahembwe amakipe 8 ya mbere agabana miliyoni 280 Frw. APR FC yegukanye igikombe yahawe miliyoni 80 Frw, ikurikirwa na Rayon Sports (miliyoni 60 Frw) na Kiyovu Sports (miliyoni 40 Frw).

• Icyiciro cya Kabiri mu Bagabo: Amakipe 8 yagabanye miliyoni 105 Frw, aho Sunrise FC yabaye iya mbere yatwaye miliyoni 25 Frw, ikurikirwa na Unity SC (miliyoni 20 Frw).

• Igikombe cy’Amahoro: Mu bagabo, APR FC yatwaye igikombe yahawe miliyoni 12 Frw, mu gihe mu bagore Rayon Sports WFC yatwaye igikombe yahawe miliyoni 8 Frw.

• Ibyiciro by'Abagore n'Icyiciro cya 3: Gakenke Ladies (Icyiciro cya 2 mu bagore) yatwaye miliyoni 10 Frw, naho Imanzi FC (bagabo) na Amizero WFC (bagore) batwaye ibikombe mu Cyiciro cya 3, buri imwe ihabwa miliyoni 3 Frw. Muri uyu mubare ntiharimo miliyoni 63 Frw zahawe abagore mu Cyiciro cya Mbere (Super League) muri Mata.

Perezida wa FERWAFA, Shema Fabrice, umaze amezi 9 gusa ku buyobozi, yavuze ko iyi ari intambwe ya mbere yo kongera ireme ry’umupira w’u Rwanda, kandi ko mu ngengo y’imari itaha baziga uburyo ibi bihembo byakongerwa cyangwa bikagera ku makipe menshi kurushaho.