UMUSARURO UKUBYE KABIRI: Guverineri Rubingisa yasabye impinduka mu buhinzi n’ubworozi i Rwamagana

Guverineri w’Intara y’Iburasirazuba, Pudence Rubingisa, yahamagariye abayobozi n’abafatanyabikorwa mu Karere ka Rwamagana guhuriza hamwe ingufu kugira ngo umusaruro w’ubuhinzi n’ubworozi wikube kabiri mu bwinshi no mu bwiza.

Ibi yabigarutseho mu nama nyunguranabitekerezo yibanze ku kwinjiza ingufu zisubira (Renewable Energy) mu buhinzi binyuze mu cyanya kigega cy’ibiribwa cyiswe FoBaSI (Food Basket Strategic Initiatives). Iyi gahunda nshya igamije gufasha abahinzi bato gukora ubuhinzi bwa kinyamwuga bwihanganira imihindagurika y’ikirere.

FoBaSI: Gahunda ije gukemura ibibazo by’abahinzi bato

Mu gihe ishoramari rinini rikunze kwibanda ku buso burenga hegitari 500, gahunda ya FoBaSI yo yibanda ku bahinzi bishyize hamwe:

• Ubuso bukorerwaho: Hegitari eshanu (5) zigenzurwa n’amatsinda y’abaturage.

• Inkunga ya Leta: Abahinzi bubakirwa ubushobozi mu by’amafaranga, bagahabwa inyongeramusaruro n’ibikoresho nk’imashini zuhira (Irrigation).

• Ikoranabuhanga: Kwifashisha amakuru y’iteganyagihe n’ingufu zituruka ku rirasanzuba (Solar energy) mu kuhira umusaruro.

Ijwi ry’abahinzi n’abikorera

Abahinzi bo mu Murenge wa Rubona, barimo Ndayisaba Emmanuel, bagaragaje ko bafite inyota yo kurenga kweza toni imwe kuri hegitari. Bavuze ko bakeneye cyane moteri zuhira n’amahugurwa ahoraho kugira ngo babyaze umusaruro ubutaka bwabo.

Ku rundi ruhande, Mwenedata Laurient, Perezida wa PSF mu Ntara y’Iburasirazuba, yibukije ko iyi Ntara ari yo "Kigega cy'Igihugu", bityo ubutaka bwose budakoreshwa neza bukwiye guhindurwa isoko y’umusaruro wikubye kabiri.

Inyongeragaciro binyuze muri SNV na EPD

Binyuze mu bufatanye n’umuryango wa SNV n’ihuriro rya EPD Rwanda, abahinzi b’i Rwamagana batangiye guhabwa ibikoresho by’ingufu zisubira bituma bahangana n’izuba rishiye. Ibi bikoresho bitangwa kuri nkunganire ya Leta kugira ngo bigere kuri buri muhinzi ku giciro gito.

UBUREZI: Uturere twa Masaka twungutse ibyumba 6 by’amashuri y’inshuke n’irerero