INTWARO NSHYA: Koreya ya Ruguru yagerageje ibisasu biteza umwijima n’ibyangiza ikoranabuhanga

 

Leta ya Pyongayang binyuze mu Biro Ntaramakuru byayo (KCNA), yatangaje ko yakoze igerageza ry’iminsi itatu ry’intwaro zifite ikoranabuhanga ryo mu rwego rwo hejuru, zigamije guhagarika ibikoresho by’ikoranabuhanga n’imiyoboro y’amashanyarazi y’abanzi bayo.

Iri gerageza ryagenzuwe n’Umujenerali Kim Jong-sik, ryibanze ku ntwaro nshya zidasanzwe mu bubiko bw’iki igihugu, zitezweho guhindura imiterere y’ubwirinzi bwo mu kirere n’ibitero by’ikoranabuhanga.

Imiterere y’intwaro nshya zageragejwe:

• Ibisasu bya Carbon Fiber: Ibi bisasu bimanura utuntu twitwa graphite ku bigo bitanga amashyanyarazi, bigateza inkongi n'ihagarara ry'amashanyarazi (short circuit). Ibi bituma umwanzi asigara mu mwijima w'icuraburindi.

• Intwaro za Electromagnetic Pulse (EMP): Izi zagenewe guhagarika burundu ibikoresho bya elegitoronike nka za radar, indege, n'itumanaho rya gisirikare bitabaye ngombwa ko habaho iturika rishyira hanze imirasire ya nukleyeri.

• Ubwirinzi bugendanwa: Hashyizwe ahagaragara sisitemu nshya yo gukumira ibitero byo mu kirere ishobora kwimurwa vubavuba.

Ingaruka ku karere: 

Igisirikare cya Koreya y’Epfo cyatangaje ko cyabonye misile zagiye ku ntera iri hagati y’ibirometero 240 na 700. Ibi bije mu gihe umwuka mubi ukomeje kwiyongera, aho Minisitiri w’ububanyi n’amahanga wungirije wa Koreya ya Ruguru, Jang Kum-chol, aherutse gutangaza ko Koreya y’Epfo ari cyo gihugu cya mbere cy’umwanzi bafite muri uyu mwaka wa 2026.

Isesengura rya Inganjinews

Iyi ntambwe ya Koreya ya Ruguru irerekana ko intambara yo muri iyi myaka  itagishingiye ku mbunda n’ibifaru gusa, ahubwo ishingiye ku Kuzimya umwanzi. Intwaro za EMP na Carbon Fiber ziteje akaga kuko zishobora gusubiza inyuma iterambere ry’igihugu mu kanya gato, zigahagarika ibitaro, amashanyarazi, n'itumanaho rya gisirikare hatamenyetswe amaraso menshi, ariko igihugu kikaba imfungwa.

Kuri twe muri Afurika n'ahandi ku isi, ibi biratwibutsa akamaro ko kurinda imiyoboro y'amashanyarazi n'itumanaho (Cyber and Infrastructure security), kuko intwaro nk'izi zishobora gukoreshwa mu gihe gito cyane kandi zikagira ingaruka z’igihe kirekire ku bukungu n’umutekano.

 UMUTEKANO MUKE: Amerika yaburiye abaturage bayo kutajya muri Nigeria