Ikinyarwanda mu Ikoranabuhanga: Inteko y’Umuco yamuritse Inkoranyamuga nshya y’Ikoranabuhanga

 

Kuri uyu wa Gatanu, tariki ya 27 Werurwe 2026, Inteko y’Umuco yamuritse ku mugaragaro Inkoranyamuga y’Ikoranabuhanga, igitabo cy’amapaji 274 gikubiyemo amagambo (amuga) agera ku 1,700 yerekeye mudasobwa n’ubuhanga buyishamikiyeho.

Iyi nkoranyamuga ije ari igisubizo ku bushakashatsi bwakozwe mu 2025 bwerekanye ko Abanyarwanda bavanga Ikinyarwanda n’izindi ndimi (cyanecyane Icyongereza n’Igifaransa) bitewe n’uko babura amagambo y’Ikinyarwanda y’umwuga mu rwego rw’ikoranabuhanga.

Ibyaranze iki gitabo n’ubushakashatsi bwacyo

Intebe y’Inteko y’Umuco, Ambasaderi Robert Masozera, yagaragaje ko iki gitabo ari umusaruro w’imyaka itatu y’ubushakashatsi bwimbitse:

• Ubufatanye: Iki gitabo cyakozwe n’abahanga mu ndimi bafatanyije n’inzobere mu by’ikoranabuhanga.

• Intego: Gufasha Abanyarwanda kumva no gukoresha ikoranabuhanga mu rurimi rwabo rw’Ikinyarwanda, kuko igihugu cyashyize imbaraga nyinshi mu ruganda rw’ikoranabuhanga.

• Gucura amagambo: Amagambo amwe yagiye acurwa hagamijwe ko asomeka kandi akumvikana mu buryo bworoshye, bitandukanye n’ayajyaga acurwa n’ibigo by’ubucuruzi rimwe na rimwe akagora abantu.

Amuga mu zindi nzego

Usibye ikoranabuhanga, Inteko y’Umuco yatangaje ko ubu hari n’izindi nkoranyamuga zagiye zishyirwa hanze zirimo:

1. Ubuhinzi n’Ubworozi.

2. Ubukungu n’Imari.

3. Ibimera n’umuntu.

Umunyamabanga Uhoraho muri MINICT, Eraste Rurangwa, yashimangiye ko iyi nkoranyamuga izafasha abagorwaga n’indimi z’amahanga gusobanukirwa neza amakuru y’ikoranabuhanga binyuze mu Kinyarwanda.

Gusura Inkoranyamuga

Niba wifuza kumenya ijambo ry’Ikinyarwanda ryasimbura iry’Icyongereza ukoresha kuri mudasobwa yawe, ushobora gusura iyi nkoranyamuga hano: tinyurl.com/inkoranya.