Uganda: Amerika yaburiye abaturage bayo nyuma y’intsinzi ya Museveni n'imyigaragambyo yatumijwe na Bobi Wine

 

KAMPALA – Ambasade ya Leta Zunze Ubumwe za Amerika muri Uganda yasohoye umuburo ukomeye ugenewe abaturage bayo bari muri icyo gihugu, nyuma y’uko Komisiyo y’Amatora itangaje ko Perezida Yoweri Kaguta Museveni yatsindiye kuyobora manda ya karindwi.

Uyu mwanzuro wo kuburira abaturage ba Amerika uje mu gihe muri Uganda havugwa umwuka utari mwiza ushingiye ku matora ya Perezida n’ay’Abadepite yabaye mu cyumweru gishize, amatora asize uruhande rutavuga rumwe na Leta ruyobowe na Bobi Wine rwinubira ibyavuyemo.

Ibyo abaturage ba Amerika basabwe kwitwararika

Binyuze mu rwandiko rwashyizwe ahagaragara kuri iki Cyumweru, tariki ya 18 Mutarama 2026, Ambasade ya Amerika yasabye abaturage bayo:

• Kwigengesera: Gukurikiranira hafi amakuru atangazwa n’ibitangazamakuru byo muri Uganda.
• Kwirinda ikivunge: Kwirinda kujya ahantu hateraniye abantu benshi ndetse no kwirinda ahari imyigaragambyo.
• Kutigaragaza cyane: Gusabwa kugaragara nk’abantu basanzwe (low profile) kugira ngo batatungwa n'agatoki.
• Itumanaho n'Ibyangombwa: Guhora bitwaje telefoni zifite umuriro, kumenya nimero z'ubutabazi, kandi buri gihe bakitwaza ibyangombwa byabo by’inzira (Passports na Visa).

Intsinzi ya Museveni n'imvugo "Fake Results" ya Bobi Wine

Ku wa Gatandatu, tariki 17 Mutarama, ni bwo Komisiyo y’Amatora muri Uganda yatangaje ko Perezida Museveni w’imyaka 81, yegukanye intsinzi n’amajwi 72%, mu gihe Robert Kyagulanyi (Bobi Wine) yagize 25%.

N'ubwo intsinzi yashyikirijwe Museveni, Bobi Wine yahise yamagana ibyavuye mu matora abyita "amajwi y’amahimbano" (fake results). Uruhande rwe rugaragaza ko amatora yaranzwe n’ubujura bw’amajwi, aho bamwe mu bakozi ba Komisiyo y’Amatora bagaragaye bishyirira akamenyetso ku mukandida wa NRM.

Bobi Wine yahise asaba abayoboke be gutangira imyigaragambyo yo mu mahoro yo kwamagana ibyo yise "kwiba ijwi rya rubanda."

Indorerezi z'amahanga n'itumanaho

N'ubwo Bobi Wine n'ishyaka rye bataka kwibwa, indorerezi z’Umuryango wa Afurika Yunze Ubumwe (AU) zatangaje ko kugeza ubu nta bimenyetso simusiga zifite byerekana ko habayeho kwiba amajwi mu buryo bwagutse.

Aya matora yabaye mu gihe internet yari yarafunzwe mu gihugu hose, ikaba yongeye gufungurwa nyuma y’uko amajwi yatangajwe. Perezida Museveni, umaze imyaka hafi 40 ku butegetsi (kuva mu 1986), azayobora Uganda mu yindi myaka itanu iri imbere.