Donald Trump yavuze ko guhagarika intwaro kirimbuzi za Iran biri imbere y’ibibazo by’ubukungu bwa Amerika
Perezida wa Leta Zunze Ubumwe za Amerika, Donald Trump, yashimangiye ko intego ye ya mbere mu gushaka imishyikirano na Iran atari ukuzahura ubukungu bw’igihugu cye bwugarijwe n’ibiciro bya peteroli, ahubwo ari ukureba ko Tehran itazigera itunga intwaro kirimbuzi.
Ibi yabivuze mu gihe intambara imaze ibyumweru birenga 10 imaze guhungabanya bikomeye isoko ry’isi.
Ubukungu vs Umutekano: Icyo Trump abivugaho
Ku wa 12 Gicurasi 2026, ubwo yari yerekeje mu ruzinduko mu Bushinwa, Trump yabajijwe niba izamuka ry’ibiciro n’ibibazo by’ubukungu ku Banyamerika ari byo biri kumuhatira gushaka ibiganiro na Iran.
Yasubije adashidika ko ubukungu atari bwo ashyize imbere, ati: “Ntidushobora kwemera ko Iran itunga intwaro kirimbuzi. Ni ibyo. Icyo ni cyo cyonyine kinshishikaje”.
Ibi byashimangiwe na Steven Cheung, Umuyobozi w’Itumanaho muri White House, wavuze ko ubu buyobozi bushishikajwe n’umutekano w’Abanyamerika kuko intwaro kirimbuzi muri Iran zaba ari akaga gakomeye.
Ingaruka z’intambara n’ifungwa rya Hormuz
Intambara ya Iran yagize ingaruka zikomeye ku bukungu bw’Isi nyuma y’uko Tehran ifunze inzira ya Hormuz inyuzwamo 20% by’ibikomoka kuri peteroli ku Isi. Ibi byatumye:
Ibiciro by’ingufu muri Amerika bizamukaho 3,8% muri Mata 2026, bingana n’inyongera ya 17,9% ugereranyije n’umwaka ushize.
Aba-Républicain bagize impungenge ko guhungabana k’ubukungu bishobora gutuma batakaza imyanya mu Nteko Ishinga Amategeko mu matora ari imbere.
Uko ibintu bihagaze mu nzego z’ubutasi
Nubwo Amerika ikomeje gushaka inzira yo guhagarika Iran, ubusesenguzi bw’inzego z’ubutasi bwerekanye ko bitashoboka mu buryo bworoshye.
Raporo zerekana ko kuva umwaka ushize, igihe byasabaga Iran ngo ibe yageze ku ntwaro kirimbuzi kitahindutse, kabone n’ubwo yaba yarashweho ibisasu bikomeye mu minsi ishize.
Kuri Trump, ibibazo by’ubukungu biri ku Isi hose ariko ikiza ku mwanya wa mbere ni ukurinda ikoreshwa nabi ry’ingufu za nucléaire.
No comments