AFC/M23 yashinje Human Rights Watch kubogama no gukorera mu kwaha kwa Leta ya Kinshasa

 

Ihuriro rya politiki n’igisirikare rya AFC/M23 ryasohoye itangazo rikaze ryamagana raporo y’umuryango urengera uburenganzira bwa muntu, Human Rights Watch (HRW), riwushinja gukwirakwiza ibinyoma no guharabika uyu mutwe ugamije gushimisha ubutegetsi bwa Perezida Félix Tshisekedi.

Ibyaha HRW ishinja AFC/M23 

Raporo ya HRW yasohotse ku wa 14 Gicurasi 2026, ishinja abarwanyi ba AFC/M23 ibyaha bikomeye byabereye mu Mujyi wa Uvira n’inkengero zawo hagati y’Ukuboza 2025 na Mutarama 2026. Muri ibyo byaha harimo:

• Kwica abasivili.

• Gufata abagore ku ngufu.

• Gushimuta abantu.

HRW ivuga ko aya makuru yayakuye mu buhamya bw’abantu 120, barimo abo mu nzego z’umutekano n’ubutasi ba RDC n’u Burundi.

Gusubiza kwa AFC/M23: "HRW yinjiye mu bukuye bwa politiki" 

Kuri uyu wa 15 Gicurasi, Umuvugizi wa AFC/M23, Lawrence Kanyuka, yagaragaje ko iyi raporo idafite ishingiro kuko yubakiye ku "cengezamatwara rya Leta ya RDC". 

Yavuze ko HRW yahisemo kwirengagiza ubwicanyi bukorerwa mu bice bigenzurwa na Leta, nko muri Beni, Ituri na Minembwe, kugira ngo irinde isura ya Kinshasa.

Kanyuka yongeyeho ko HRW iceceka imikoranire iri hagati y’ingabo za RDC (FARDC) n’umutwe w’iterabwoba wa FDLR, ugizwe n’abakoze Jenoside yakorewe Abatutsi mu 1994. Kuri we, ibi bituma HRW itakarizwa icyizere nk’umuryango wigenga.