Ubutabera bwo ku muhanda i Goma: Umugabo yishwe n'abaturage azira ibihuha byo "kunyereza igitsina"

Mu Mujyi wa Goma, ubugizi bwa nabi bushingiye ku bihuha n’ubujiji bukomeje gufata intera iteye inkeke. Kuri uyu wa Gatandatu, mu gace ka Ndosho muri Komini ya Karisimbi, umugabo utatangajwe amazina yishwe n’agatsiko k’abaturage nyuma yo gukwirakwiza amakuru y’ibinyoma ko yaba "yanyereje igitsina" cy’undi mugabo.

Ibihuha byasize amaraso 

Abatangabuhamya bavuga ko uyu mugabo yagabweho igitero n’abantu benshi bari bafite uburakari budasanzwe, bamutera amabuye kugeza ubwo ashizemo umwuka. Ibi byabaye mu gihe nta gihamya na kimwe cyari gihari kigaragaza ko uwo mugabo hari icyo yakoze, uretse imyizerere n'imvugo z'abantu bo mu muhanda.

Ubuyobozi bwamaganye kwiha ubutabera 

Inzego z’ibanze i Goma zanyomoje ibyo birego, zivuga ko bidafite ishingiro na rito. Umuyobozi w’Umujyi wa Goma washyizweho n’ihuriro rya AFC/M23, Désiré Kisuba Ngabo, yasohoye itangazo ryamagana iri hohoterwa.

Muri iryo tangazo, yashimangiye ko:

• Nta muntu n’umwe wemerewe n'amategeko kwiha ubutabera (mob justice).

• Abakwiza ibihuha bagomba guhagarara kuko bashyira mu kaga ubuzima bw’inzirakarengane.

• Inzego z'umutekano zigomba gukurikirana abagize uruhare muri ubu bwicanyi.

Iki gikorwa kije cyiyongera ku bindi bice by’Uburasirazuba bwa RDC aho umutekano muke utuma abaturage bishora mu bikorwa by’ubunyamanswa bamagana uwo ari we wese babonye mu buryo budasobanutse.

Ese ubona ari iki cyakorwa kugira ngo ibihuha nk’ibi byo "kunyereza ibice by’umubiri" bicike mu baturage ba RDC n’ibindi bihugu by’akarere?