MUKUNZI YANNICK YABONYE IKIPE: Menya byinshi kuri Helges IF yerekejemo muri Suéde

 

Umukinnyi wo mu kibuga hagati mu Ikipe y’Igihugu y’u Rwanda ‘Amavubi’, Mukunzi Yannick, yamaze kubona ikipe nshya yitwa Helges IF ikina mu Cyiciro cya Kabiri muri Suéde (Sweden), nyuma y’igihe kirekire yari amaze ari hanze y’ikibuga kubera imvune.

Iyi kipe yabyemeje kuri iki Cyumweru, tariki ya 5 Mata 2026, ibinyujije ku mbuga nkoranyambaga zayo, ivuga ko yishimiye kwakira uyu Munyarwanda uzwiho tekinike n’umurava mu kibuga hagati.

Kugaruka k’umukinnyi w’inararibonye

Mukunzi Yannick w’imyaka 30, ntabwo ari mushya muri Suéde kuko yahamaze imyaka itandatu akinira Sandvikens IF, ndetse ari mu bayifashije kuva mu Cyiciro cya Gatatu ijya mu cya Kabiri.

Icyakora, imyaka ibiri ishize ntabwo yamubereye Iyoroshye kuko yagize imvune ikomeye y’ivi (Ligament Croisé) inshuro ebyiri, byatumye amara igihe kirekire adakina mu buryo buhoraho.

Shutterstock

Impamvu yahisemo Helges IF

Yannick yagaragaje ko iyi kipe ari yo yabashije kumuha icyizere cyo kugaruka mu bihe bye byiza no gukomeza gutera imbere:

“Icyatumye mpitamo kuyikinira ni uko niyumva muri Helges. Ni ahantu heza kandi hari abantu bazi icyo bashaka. Ntekereza ko ni cyo gihe ngo hamfashe gutera imbere nk’umukinnyi.”

Ihuriro ry’abahoze muri APR FC

Muri Helges IF, Mukunzi Yannick agiye gusangayo undi Munyarwanda, Mubumbyi Bernabé, bakinanye mu myaka yo mu 2014-2015 muri APR FC. Ibi biteganyijwe ko bizafasha Yannick kumenyera vuba muri iyi kipe no guhita atangira gutanga umusaruro mu mwaka w’imikino wa 2026.

SOMA:  RULINDO: Giancarlo Davite n’umuhungu we begukanye Nyirangarama Sprint Rally 2026