AGAHENGE KARI HAFI? Donald Trump yavuze ko amasezerano na Iran ashobora kugerwaho kuri uyu wa Mbere
Perezida wa Leta Zunze Ubumwe za Amerika, Donald Trump, yatangaje ko hari amahirwe menshi y’uko amasezerano yo guhagarika intambara na Iran yagerwaho kuri uyu wa Mbere, tariki ya 6 Mata 2026. Ibi bishobora kuba iherezo ry'umuvuduko ukabije w'ibiciro by'ibiribwa n'ibikomoka kuri peteroli ku isi yose.
Mu kiganiro yagiranye na Fox News kuri uyu wa 5 Mata, Trump yagaragaje ko hari ibiganiro birimo kuba mu ibanga, n'ubwo abategetsi b'i Tehran bakunze kubihakana. Gusa, uyu muperezida ntiyashize amakenga Iran, kuko yabahaye gasopo ya nyuma.
Nibatemera, mugiye kubona ibiraro bihirima
Donald Trump yashimangiye ko niba Iran itubahirije ibyo basabwa, Amerika yiteguye gukoresha imbaraga za gisirikare zikaze:
“Nibatemera amasezerano, ndi gutekereza guterera hejuru ibintu byose ngafata amavuta. Mugiye kubona ibiraro n’inganda z’ingufu bihirima mu gihugu cyabo.”
Umuhora wa Hormuz: Inkingi ya mwamba mu bukungu
Ibiganiro byibanda cyane ku gufungura Umuhora wa Hormuz, inzira y’amazi ifatiye runini isi yose:
Peteroli: 20% by’ibikomoka kuri peteroli ku isi binyura muri uyu muhora.
Ifumbire: Kimwe cya gatatu cy’ifumbire mvaruganda ikoreshwa mu buhinzi ku isi inyura hano.
Ingaruka: Kuva iyi nzira yafungwa n'intambara, ubwato busaga 3000 bwanyuragamo buri kwezi bwaragabanyutse cyane, bituma ibiciro by'ibiribwa n'ikoranabuhanga bitumbagira.
Umubare w’abamaze kugwa mu ntambara (Kuva 2/28 - 03/4/2026)
Intambara imaze iminsi irenga ukwezi, ariko yasize imibare iteye ubwoba y'abantu bishwe n'abakomeretse:
Iran: Abantu 2,076 bishwe, 26,500 barakomereka.
Liban: 1,345 bishwe, 4,040 barakomereka.
Israel: 24 bishwe, 6,594 barakomereka.
Amerika: 13 bishwe, 200 barakomereka.
Ibindi bihugu nka Iraq, Leta Zunze Ubumwe z’Abarabu, na Arabie Saoudite na byo byagize abantu bahasiga ubuzima.
No comments