IMPINDUKA I GOMA: Menya abayobozi bashya bashyizweho mu mujyi wa Goma no muri Teritwari ya Lubero
Ubuyobozi bw’Intara ya Kivu y’Amajyaruguru bushyigikiwe n’ihuriro AFC/M23, bwatangaje impinduka mu nzego z’ubuyobozi bw’Umujyi wa Goma n’iBindi bice igenzura, hagamijwe kurushaho kunoza imitangire ya serivisi n’umutekano.
Binyuze mu itangazo ryashyizweho umukono na Guverineri Bahati Musanga Erasto kuri uyu wa Kane, tariki ya 9 Mata 2026, Kisuba Ngabo Désiré yagizwe Meya w’Umujyi wa Goma. Kisuba, wari usanzwe ari Visi Meya, asimbuye Julien Katembo Ndalieni woherejwe kuyobora Teritwari ya Lubero.
Abayobozi bashya bahawe inshingano:
Meya wa Goma: Kisuba Ngabo Désiré.
Visi Meya wa Goma: Nshimiyimana Juvénal (wari usanzwe ashinzwe ubukangurambaga muri AFC/M23).
Ubuyobozi bwa Lubero: Julien Katembo Ndalieni yagizwe Umuyobozi wa Teritwari, asimbura Katembo Isevisya wagizwe Burugumesitiri wungirije.
Komini Karisimbi: Radjabu Kwizera Elie yagizwe Burugumesitiri wungirije.
Inshingano n’imigabo n’imigambi:
AFC/M23, yafashe Umujyi wa Goma ku wa 27 Mutarama 2025, ivuga ko izi mpinduka zigamije:
Kurushaho gushimangira umutekano mu mujyi.
Kuzamura imibereho y’abaturage binyuze mu mutekano n’ubucuruzi.
Gukurikirana imishinga y’ibikorwaremezo nka gahunda yo gusubiza Goma ku murongo.
Muri Mutarama 2026, Julien Katembo ucyuye igihe yari yatangaje ko ubu Goma itekanye kurusha mbere, kandi ko ibikorwa by’ubucuruzi n’ubuzima busanzwe bikomeje nta nkomyi.
Isesengura rya Inganjinews
Izi mpinduka zije mu gihe cy’umwuka wa dipolomasi utoroshye muri uyu mwaka wa 2026. Kuba AFC/M23 iri guhindura abayobozi mu buryo bw’abasivili bitanga ubutumwa bw’uko iri huriro rishaka kwerekana ko rifite ubushobozi bwo kuyobora no gucunga imijyi minini nka Goma mu buryo burambye.
Kujyana Julien Katembo Ndalieni muri Lubero, agace nako gafite akamaro kanini mu rwego rw’ubuhinzi n’ubucuruzi, kwerekana ko AFC/M23 iri gukoresha abayobozi imenyereye mu bice bishya yagiye yigarurira kugira ngo ihasyire umurongo umwe n’uwo muri Goma.
SOMA: UBUKUNGU: Minisitiri w’Intebe Nsengiyumva yagejeje umurongo mushya ku bayobozi ba PSF
No comments