Arsenal na Atlético Madrid zanganyije mu mukino ukomeye wa ½ cya Champions League

 

Umukino ubanza wa ½ cya UEFA Champions League wahuje Arsenal na Atlético Madrid warangiye amakipe yombi agabanye amanota nyuma yo kunganya igitego 1-1, mu mukino wabereye kuri Riyadh Air Metropolitano mu ijoro ryo ku wa Gatatu.

Ni umukino watangiye amakipe yombi yigana cyane, buri ruhande rwirinda gukora amakosa ashobora gutuma rwishyura kare. Nubwo byari bimeze bityo, amahirwe make yagiye aboneka, cyane cyane ku ruhande rw’ikipe yo mu rugo yashakaga gushimisha abafana bayo.

Ku munota wa nyuma w’igice cya mbere, Viktor Gyökeres yafunguye amazamu ku ruhande rwa Arsenal atsinda penaliti, bituma bajya kuruhuka bafite akanyamuneza.

Icyakora, Atlético Madrid ntiyacitse intege. Yagarutse mu gice cya kabiri ifite inyota yo kwishyura, maze ku munota wa 56, Julián Álvarez na we atsinda penaliti yishyurira ikipe ye.

Nyuma y’aho, umukino warushijeho gukomera, buri kipe ishaka gutsinda igitego cy’intsinzi ariko ubwirinzi bw’impande zombi bukomeza kuba bwiza. Antoine Griezmann yagerageje amahirwe akomeye ariko umupira we ukubita umutambiko w’izamu.

Ku ruhande rwa Arsenal, umutoza Mikel Arteta yakoze impinduka zinyuranye ashaka kongera imbaraga mu busatirizi, ariko ntibyabahiriye kongera kubona igitego.

Mu minota ya nyuma, habayemo impaka ku cyemezo cya penaliti cyari cyahawe Arsenal, ariko umusifuzi aracyisubiraho nyuma yo kureba VAR, asanga nta kosa ryabayeho.

Umukino warangiye amakipe yombi anganya 1-1, ibintu bisiga byose bizasobanuka mu mukino wo kwishyura uzabera i Londres kuri Emirates Stadium.

U Rwanda rugaragara muri uyu mukino

Uyu mukino wari ufite umwihariko ku Banyarwanda, bitewe n’ubufatanye bw’u Rwanda n’aya makipe yombi binyuze muri gahunda ya Visit Rwanda. Ni ubufatanye bukomeje kumenyekanisha u Rwanda ku rwego mpuzamahanga, binyuze mu mupira w’amaguru.

Ese ninde uzerekeza ku mukino wa nyuma?

Nyuma y’iyi ntsinzi itabonetse, amaso yose ahanzwe umukino wo kwishyura uzagaragaza ikipe izabona itike yo kujya ku mukino wa nyuma. Buri ruhande ruracyafite amahirwe, ariko bizasaba imbaraga zidasanzwe.