Meet The President: Perezida Kagame yifatanyije n’Abayisilamu kwizihiza Eid al-Fitr muri BK Arena

 

Kuri uyu wa 25 Werurwe 2026, mu nzu y’imikino n’imyidagaduro ya BK Arena, habereye igikorwa kidasanzwe cyiswe "Meet The President". Perezida wa Repubulika, Paul Kagame, yifatanyije n’ibihumbi by’Abayisilamu baturutse impande zose z’igihugu mu birori byo gusoza ukwezi gutagatifu kwa Ramadhan n’umunsi mukuru wa Eid al-Fitr.

Iki gikorwa cyari gifite insanganyamatsiko igira iti: “Twishimire imiyoborere myiza mu Rwanda yaduhaye agaciro n’ubwisanzure mu myemerere.”

Isaranganya ry’agaciro n’amateka y’ihezwa yacitse

Mu ijambo rye, Perezida Kagame yagarutse ku mateka mabi y’ihezwa Abayisilamu bahuye na yo mu bihe byashize, ashimangira ko ubu u Rwanda rwahinduye amatwara.

“Ubu rero ni inzira yo guhindura ubuzima, imiyoborere n’amatwara. Igihugu cy’u Rwanda kigatera imbere Abanyarwanda bose bafite uruhare, nta wutotezwa nk’uko bikwiye,” – Perezida Paul Kagame.

Umukuru w’igihugu yavuze ko ibyo ashimirwa byose ari ibyari bikwiye gukorwa, kuko buri Munyarwanda afite uburenganzira bwo guhabwa agaciro mu gihugu cye.

Ishimwe rya Mufti w’u Rwanda ku rugendo rwa Mecca

Mufti w’u Rwanda, Sheikh Sindayigaya Mussa, yashimiye Perezida Kagame uburyo yafashije Abayisilamu koroherezwa mu nshingano zabo z'idini, cyanecyane umutambagiro mutagatifu w'i Mecca.

Muri ibi birori, hagaragajwe intambwe ikomeye yatewe:

• Uruhare rwa RwandAir: Kuri ubu Abayisilamu bava i Kigali bakagera i Jeddah cyangwa Madina mu buryo bwihuse (Direct flights), bitandukanye na mbere.

• Gusubizwa imitungo: Mufti yashimiye Perezida ko Abayisilamu basubijwe imitungo yabo bari barambuwe mu buryo bw’akarengane.

• Uburenganzira bwa Eid: Ishimwe ku cyemezo cyongeye guha umunsi wa Eid al-Fitr agaciro nk’ikiruhuko mu gihugu cyose.

Icyerekezo gishya cy’imiyoborere

Iki gikorwa cyari uburyo bwo gushimangira ko imvugo ari yo ngiro ku buyobozi bw’u Rwanda. Perezida Kagame yashoje yizeza amadini n’amatorero ko leta izakomeza gushyigikira ibikorwa byose byiza bigarura agaciro k’umuturage no kubaka ubumwe bw’Abanyarwanda.