Visi Perezida wa Kenya yarakariye ikigo cy’igihugu gishinzwe iperereza asaba umuyobozi wacyo kwegura

Visi Perezida wa Kenya, Rigathi Gachagua, yanenze ku mugaragaro ikigo cy’igihugu gishinzwe iperereza n’umuyobozi wacyo avuga ko yananiwe kumenyesha Perezida ku gihe ibijyanye n’imyigaragambyo ikaze yategurwaga yaje kugwamo abantu ku wa Kabiri.

Gachagua yavuze ko umuyobozi wa NIS, Noordin Haji yananiwe kumenyesha Perezida ubukana bw’iyi myigaragambyo ku gihe ngo hakumirwe ubwicanyi butigeze bubaho ndetse no guhitana ubuzima.

Gachagua yagize ati: "Kandi nifatanije n’umukoresha wanjye Perezida William Ruto kuko aya makuru atayabonye." Yatangaje ibi ku mugoroba wo ku wa Gatatu, ari iwe i Mombasa nk’uko tubikesha ikinyamakuru The Star cyo muri Kenya.

Visi Perezida Gachagua yavuze ko nyuma y’ubugenzuzi bukomeye, Haji agomba gukora ikintu cyiyubashye kandi akegura.    Ati: "Dufite ikigo cy’igihugu gishinzwe iperereza kidakora neza cyashyize ku karubanda Perezida, guverinoma ndetse n’abaturage ba Kenya".

Yakomeje agira ati "Iyo ikigo cy’igihugu gishinzwe iperereza kimenyesha Perezida amezi abiri ashize uko abaturage bumva umushinga w’itegeko ry’imari, 2024, Abanyakenya benshi ntibari gupfa, imitungo ntiyari gusenywa, ibiro ntibyari gusenywa. Ntihari kubaho akaduruvayo, ariko baryamye ku kazi. ”

Gachagua yavuze ko byagombye gufata imyigaragambyo mu gihugu cyose kugira ngo perezida amenye ukuri ku kuntu abantu bumvaga imisoro mishya yatekerejwe muri uyu mushinga w’itegeko "nyamara hari umuryango wishyurwa n’abaturage kugira ngo umenyeshe Perezida na guverinoma ibyiyumvo by’Abanyakenya ".

Yongeyeho ko abayobozi bakuru ba Polisi y’igihugu bamubwiye mu ibanga ko nta makuru bari bafite mbere y’ubukana bw’imyigaragambyo yateguwe ahanini n’urubyiruko. Yavuze ko kubera iyo mpamvu, inzego z’umutekano zoherejwe guhosha imyigaragambyo zisanze zititeguye ubukana bw’imyigaragambyo.

Gachagua yavuze ko Haji agomba kwirengera ingaruka z’aka kaduruvayo kadutse mu gihugu, kandi ibyo bidahagije agomba no kwegura ku mirimo ye.

Ku wa Kabiri, igihugu cyabonye urwego rutigeze rubaho rwo kwigomeka kw’abaturage mu gihe Abanyakenya bakoze urugendo rwo kwamagana icyemezo cy’Inteko Ishinga Amategeko cyo gutora umushinga w’itegeko ry’imari, 2024. Iri tegeko ryemejwe n’abadepite 195 ku 106 batoye baryanga.

Ibi byateje umujinya n’uburakari mu bigaragambyaga barenga kuri bariyeri z’umutekano kandi binjira mu nyubako z’Inteko Ishinga Amategeko bagerageza ’guhura’ n’abadepite. Benshi mu bigaragambyaga bararashwe baricwa mu gihe igice cy’Inteko ahakorera Sena cyasahuwe ndetse kiratwikwa.