Tanzania: "Nta mugore utwite ugomba kwangirwa ubuvuzi kubera amafaranga"—Minisitiri w’Ubuzima yatanze gasopo ikaze

 

Guverinoma ya Tanzania yafashe icyemezo cyo guhagurukira abakozi bo mu rwego rw’ubuzima bakomeje kurenganya abagore batwite babaka amafaranga y’ubuvuzi, kandi amategeko y’icyo gihugu ateganya ko bagomba kuvurwa ku buntu.

Akarengane gakorerwa abagore batwite 

Nubwo itegeko ryo mu 2007 rishimangira ko abagore batwite n’abana bari munsi y’imyaka itanu bagomba guhabwa serivisi z’ubuvuzi ku buntu, raporo zigaragaza ko mu mavuriro ya Leta hari ababyeyi bakwa hagati y’amashilingi 15,000 na 30,000. 

Usibye kwakwa amafaranga, aba bagore banahatirwa kwigurira ibikoresho by’ibanze nk’uturindantoki (gloves), ibintu binyuranyije n’amabwiriza agenga ubuvuzi muri icyo gihugu.

Ibihano bikaze ku bazafatirwa mu cyuho 

Minisitiri w’Ubuzima, Mohamed Mchengerwa, yavuze ko bitazigera byihanganirwa na busa. Yatangaje ko umuganga wese cyangwa umukozi wo kwa muganga uzafatwa asaba umugore utwite kwishyura mbere yo guhabwa serivisi, azahita:

• Yirukanwa ku kazi bidatinze.

• Yamburwa uburenganzira bwo gukora umwuga w’ubuvuzi (License) burundu.

Minisitiri w’Intebe, Mwigulu Nchemba, na we yashimangiye ko umugore utwite agomba kwakirwa "ako kanya" nta mananiza, agahabwa ibikoresho byose n’ubuvuzi bunezeza umubiri n’umutima bitamusabye gusohora n’ikorera rimwe.

Isomo ku miyoborere y’ubuzima 

Iki kibazo kigaragaza ko hagati y’itegeko ryanditse n’uburyo rishyirwa mu bikorwa hagenda hazamo icyuho giterwa n’indangagaciro nke za bamwe mu bakozi. 

Abahanga mu by’ubuzima muri Tanzania basanga gukaza ubugenzuzi ari ryo shingiro ryo kurinda ubuzima bw’ababyeyi n’abana bari munsi y’imyaka itanu.

Ese ubona kwambura umuganga uruhushya rwo gukora (License) ari cyo gihano gikwiye ku muntu unyereza serivisi z’ubuntu zigenewe abaturage batishoboye? Twandikire igitekerezo cyawe.