NGOMA: Inkuba yakubise abantu 26 mu gishanga cy’umuceri, umwe ahita yitaba Imana

 

Agahinda ni kose mu Murenge wa Gashanda, mu Karere ka Ngoma, nyuma y’aho inkuba ikubise abaturage 26 bari bugamye imvura mu nzu y’ububiko bw’umuceri. Ibi byago byabaye ku gicamunsi cyo kuri uyu wa Mbere, tariki ya 13 Mata 2026, mu Kagari ka Cyarwa.

Ishusho y’iyi mpanuka:

• Aho byabereye: Mu gishanga gihingwamo umuceri muri Gashanda.

• Uko byagenze: Abaturage bari mu mirima imvura irabafata, bajya kugama mu nzu y’ububiko (store) ari na ho inkuba yabasanze.

• Umubare w’abajyanywe kwa muganga: Umuntu umwe yitabye Imana uwo mwanya, batatu bajyanwa ku Kigo Nderabuzima cya Gashanda, naho abandi 22 boherezwa ku bitaro bya Kibungo kwitabwaho n'abaganga.

Umunyamabanga Nshingwabikorwa w’Umurenge wa Gashanda, Ngenda Mathias, yihanganishije imiryango y’ababuze uwabo ndetse n’abari kwa muganga, ashimangira ko ubuyobozi buri gukurikiranira hafi ubuzima bw’abakomeretse.

Akaga k’inkuba mu Karere ka Ngoma

Ibi byago bije bikurikira izindi mpanuka z’inkuba zikunze kwibasira aka Karere. Twibuke ko mu ntangiriro z’uyu mwaka (ku wa 4 Mutarama 2026), mu Murenge wa Jarama na bwo inkuba yakubise abantu 15, icyenda muri bo bahita bitaba Imana. Muri uyu mugoroba kandi, no mu Murenge wa Rukumberi havuzwe undi muturage wakubiswe n’inkuba ubu akaba ari kuvurirwa i Gituza.

Inganjinews Isesengura: "Gugama mu nzu zidafite imirindankuba"

Iki kibazo cy’inkuba zikomeje kwibasira Intara y’Iburasirazuba kirasaba ingamba zifatika. Nk'uko Umunyamabanga Nshingwabikorwa w'umurenge yabishimangiye, abaturage bakwiye kwirinda kugama munsi y'ibiti cyangwa mu nzu z’ububiko zidafite imirindankuba (Lightning rods) igihe imvura igwa.

Bikwiye ko amakoperative y’abahinzi mu bishanga n’inzego z’ibanze bafatanya gushyira imirindankuba ku nzu zose z’ububiko no ku nyubako zihuriramo abantu benshi, kuko abahinzi benshi bahura n’aka kaga bashatse aho bugama bitunguranye.

 ITERAMBERE: Abikorera b’i Karongi bagiye kubaka igorofa rya miliyari 1 Frw binyuze mu kigega KDF