AGAHINDA K’U BUTALIYANI! Gattuso yatakarije itike y’Igikombe cy’Isi iwayo, Afurika yuzuza amakipe 10
Isi yose yatunguwe kuri uyu wa Kabiri, tariki ya 1 Mata 2026, ubwo ikipe y’igihugu y’u Butaliyani (Gli Azzurri) yongeraga kubura itike y’Igikombe cy’Isi ku nshuro ya kane yikurikiranya, nyuma yo gutsindwa na Bosnia na Herzegovina.
Uyu mukino wa kamarampaka (Play-off) wabaye mu rucyerera, wasize u Butaliyani mu gahinda gakomeye, mu gihe umutoza wabwo Gennaro Gattuso we yahise ashyira amakosa ku buryo imyanya y’amakipe mu Gikombe cy’Isi cy’uyu mwaka yateguwe.
Uko umukino wagenze: Ikarita itukura yahinduye imibare
U Butaliyani bwari bwatangiye neza uyu mukino, dore ko ku munota wa 15 gusa, rutahizamu Moise Kean yari amaze kunyeganyeza ishura za Bosnia. Gusa, ibintu byaje guhinduka ku munota wa 41 ubwo u Butaliyani bwahabwaga ikarita itukura, bigatuma amayeri ya Gattuso asubira inyuma.
Bosnia yaje kwishyura iki gitego ku munota wa 79 binyuze kuri Haris Tabakovic, umukino urinda urangira ari 1-1. Mu gutera za penaliti, u Butaliyani bwongeye guhura n'umuvumo wabwo buseruka nabi, butsindwa penaliti 4-1.
Gattuso na FIFA: Intambara kuri Afurika
Nyuma y’umukino, Gennaro Gattuso ntabwo yariye iminwa. Yagaragaje ko kutagenda neza kw’ikipe ye bishobora kuba bifitanye isano n’imiterere y’irushanwa, anenga FIFA uburyo yahaye Afurika imyanya 10 muri uyu mwaka.
Ibi Gattuso yabivuze nyuma y’uko Repubulika Iharanira Demokarasi ya Congo (RDC) itsinze Jamaica ikaba ikipe ya 10 yo muri Afurika ibonye itike. RDC yasanze izindi kipe zikomeye zirimo:
Afurika y’Epfo, Maroc, Côte d’Ivoire, Tunisia, Misiri, Cap-Verde, Senegal, Algeria, na Ghana.
Amateka mashya ku zindi kipe
Mu gihe u Butaliyani buri mu marira, ikipe ya Iraq yo yashyizeho agahigo nyuma yo gutsinda Bolivia ibitego 2-1, ikaba yongeye kubona itike y’Igikombe cy’Isi nyuma y’imyaka 40 yari ishize itegereje.
Igikombe cy’Isi cya 2026 gitegerejwe n’isi yose, kizabera muri Leta Zunze Ubumwe za Amerika, Mexique, na Canada kuva tariki ya 11 Kamena kugeza ku ya 19 Nyakanga 2026.
Soma:
No comments