RUTSIRO: Ingo ziri gusenyuka kubera umuco wo ‘kuzitura’ wadukanwe n’abagore

 

Abaturage bo mu isantere yo kwa Shuni, iherereye mu Kagari ka Kabujenje, Umurenge wa Kivumu mu Karere ka Rutsiro, baragaragaza impungenge zikomeye baterwa n’umuco mushya bise “kuzitura”, aho bamwe mu bagore bata abagabo n’abana bakajya kwishakira abandi bagabo.

Uyu muco bivugwa ko ugaragara cyane iyo umugabo atangiye gukena cyangwa urugo rugaragayemo amakimbirane. Abaturage batangaje ko hari abagore basiga abana bato (harimo n’ab’imyaka ibiri) bakajya gushaka ahandi, rimwe na rimwe bakabyita "kujya gushaka akazi" ariko bakarangiza bashatse abandi bagabo.

Ibyatangajwe n’abaturage:

• Nyirabaribeshya Emerance: Avuga ko uyu muco umaze gufata intera aho abagore bamwe bawugize nk’urucuruzo, bagenda bashaka abagabo batandukanye mu buryo budahwitse.

• Nzabonimpa Emmanuel: Yatanze ingero z’abagore bataye abana batatu cyangwa babiri muri uku kwezi kwa Mata 2026, asaba Leta guhana ababyeyi bagaragaza ubu burangare.

Uburyo uyu muco ushobora kugira ingaruka:

1. Ihungabana ry’abana: Abana basigwa n’ababyeyi babo b’abagore bahura n’ikibazo cy’imirire mibi n’uburere budahwitse.

2. Igwingira ry’iterambere: Ingo zidafite umutekano n’ubwumvikane ntizishobora gutera imbere.

3. Amakimbirane mu muryango: Uyu muco wongera urwango n’ubushyamirane hagati y’imiryango y’abagabo n’abagore.

Icyo Ubuyobozi bw’Akarere buvuga

Umuyobozi Wungirije w’Akarere ka Rutsiro ushinzwe Imibereho Myiza y’Abaturage, Umuganwa Marie Chantal, yatangaje ko uyu muco utari usanzwe uzwi mu buyobozi, ariko ko bagiye kuwukurikirana vuba.

Ati: “Iki kibazo tugiye kugikurikirana tumenye uko giteye niba gihari. Icyo dukora ni ugukomeza kwigisha imiryango kubana neza, kwirinda amakimbirane, no gushishikariza ababana batarasezeranye kubikora mu buryo bwemewe n'amategeko.”

Isesengura rya Inganjinews

Iri jambo “kuzitura” rirerekana ihinduka ry’imyumvire mibi ku nshingano z’umubeyi w’umugore mu muryango. Mu gihe u Rwanda ruri gushyira imbaraga mu kurwanya igwingira ry’abana no kubaka umuryango ushoboye kandi utekanye, imyitwarire nk’iyi muri Rutsiro ishobora gusubiza inyuma intambwe imaze guterwa.

 Ikibazo giteye impungenge ni uko bivugwa ko uyu muco urebana cyane n'ubukene. Ibi bishatse kuvuga ko hagikenewe inyigisho z’ubukungu mu miryango (Financial literacy) n’iz’isanamitima kugira ngo abagore n’abagabo bumve ko urugo rutubakiwe ku mafaranga gusa, ahubwo n’ubumuntu n’inshingano ku bana babyaye.

 IKIRERE CY’IJORO: U Rwanda rugaragara nk’icyitegererezo mu kumurika muri Afurika