INTWARO NSHYA: U Bushinwa buritegura guha Iran sisitemu z’ubwirinzi bwo mu kirere
Mu gihe amaso y’isi yose ari i Islamabad muri Pakistan mu biganiro by’amahoro, amakuru y’iperereza rya Amerika yashyizwe hanze na CNN kuri uyu wa Gatanu, tariki ya 10 Mata 2026, aremeza ko u Bushinwa buri hafi guha Iran intwaro nshya z’ubwirinzi bwo mu kirere.
Ingingo z’ingenzi zikubiye muri aya makuru:
Ubwoko bw’intwaro: Bivugwa ko u Bushinwa bugiye gutanga intwaro zizwi nka MANPADS (Shoulder-fired anti-air missile systems). Izi ni misile zirashishwa n’umuntu ku rutugu, zikaba zizwiho gushobora guhanura indege zihuta n’izigendera hasi.
Amayeri yo kuzigeza muri Iran: Iperereza rishimangira ko Beijing iri gukoresha ibindi bihugu (third countries) kugira ngo ihishe inkomoko y’izi ntwaro, bityo binagorane kumenya ko ari iz’u Bushinwa.
Igihe bizabera: Biteganyijwe ko izi ntwaro zizagezwa muri Iran mu byumweru bike biri imbere, niba nta gihindutse mu biganiro by’amahoro.
Isesengura rya Inganjinews: "Imikino y'imbaraga" (Power Play)
Iyi nkuru ije mu gihe kidasanzwe. Hari impamvu ebyiri zishobora kuba zihishe inyuma y’iki gikorwa cy’u Bushinwa:
Gushyira igitutu kuri Amerika: U Bushinwa bushobora kuba bushaka kwereka Amerika ko niba idahaye Iran ibyo ishaka mu biganiro by’i Islamabad, Iran izahita ibona intwaro zikomeye zizayifasha guhangana n’indege za Amerika na Israel.
Kwinjirira mu cyuho: Mu gihe intambara imaze ibyumweru bitandatu, u Bushinwa burashaka kwigaragaza muri Iran nk’umufatanyabikorwa wa mbere mu by’umutekano, cyanecyane ko intwaro nka MANPADS zishobora guhindura imigendekere y’intambara mu mijyi.
Ibi biratwereka ko intambara ya Amerika na Iran atari iy’ibi bihugu bibiri gusa. Ni intambara y’ibihugu bikomeye, aho u Bushinwa nabwo butishimiye ko Amerika yakomeza kwiharira ijambo mu Burasirazuba bwo Hagati. Ibi bishobora gutuma JD Vance agira akazi katoroshye muri Pakistan, kuko agomba kumvisha Iran ko gukomeza gushaka intwaro nshya bishobora gukoma mu nkokora amasezerano y’agahenge bari hafi kugeraho.
AGAHENGE KARI HAFI? Visi Perezida wa Amerika JD Vance yageze muri Pakistan mu biganiro na Iran
No comments