ERITREA NA CAN 2027: Eritrea yasezereye Eswatini ariko abakinnyi 7 batorokera muri Afurika y’Epfo

 

Ikipe y’igihugu ya Eritrea yanditse amateka avanze n’agahinda, aho nyuma yo gusezerera Eswatini mu ijonjora ryo gushaka itike ya CAN 2027, abakinnyi barindwi (7) mu icumi bakina imbere mu gihugu batorotse bageze muri Afurika y’Epfo.

Uyu mukino wo kwishyura wabereye i Lobamba muri Eswatini, warangiye Eritrea itsinze ku bitego 4-1, ariko ibyishimo by’intsinzi byahise bishira ubwo umutoza Hesham Yakan n’intumwa za Leta bamenyaga ko abakinnyi barindwi baburiwe irengero, bakanga gusubira mu rugo i Asmara.

Abakinnyi basubiye mu rugo ni batatu gusa:

• Ablelom Teklezgi

• Nahom Tadese

• Romel Abdu

Amateka maremare y’itoroka ry’abakinnyi ba Eritrea: 

Iki gihugu kiyoborwa na Perezida Isaias Afwerki kuva mu 1993, kimaze kumenyerwaho itoroka ry'abakinnyi mu marushanwa atandukanye kubera ibyo amatsinda aharanira uburenganzira bwa muntu bita "ikandamiza".

• Angola (2007): Abakinnyi batorotse bwa mbere mu buryo butazwi.

• Uganda (2019): Ikipe y’abatarengeje imyaka 20 yose yanze gusubira iwabo.

• Muri rusange: Abakinnyi basaga 80 bamaze guhungira mu mahanga mu bihe bitandukanye bagiye gukina, benshi bakaba bahita bareka n'umupira w'amaguru bakibera mu buhunzi.

Ingaruka ku mupira wa Eritrea: 

Kuba abakinnyi batoroka bituma Leta ifata imyanzuro ikaze, birimo kwikura mu marushanwa akomeye nka Shampiyona y'Isi (World Cup). Ibi bimaze imyaka 19 bituma iyi kipe idatera imbere, nubwo impano z'abakinnyi bayo zigaragaza ko bafite ubushobozi bwo guhangana n'ibihangange muri Afurika.

Isesengura rya Inganjinews 

Iyi nkuru iduha isomo rikomeye ku bijyanye n’uburenganzira bwa muntu n’uruhare rwa politiki mu mikino. Siporo ikwiye kuba inzira ifungura amayira y’iterambere, ariko iyo ibaye inzira yo guhungamo igihugu, birerekana ko hari ikibazo cy’isanamitima n’imiyoborere kiba gikeneye gukemuka imbere mu gihugu mbere y’uko bajya mu bibuga.

SOMA: GATSIBO: Umupadiri yatawe muri yombi azira gusomera Misa ahantu hatemewe kuri Pasika