AKAGA K’INTAMBARA: Amerika yatangiye kugota ibyambu bya Iran nyuma yo kunanirwa kw’ibiganiro

Guhera kuri uyu wa Mbere, tariki ya 13 Mata 2026, igisirikare cya Leta Zunze Ubumwe za Amerika cyatangiye gushyira mu bikorwa icyemezo cya Perezida Donald Trump cyo gufunga inzira z’amazi zerekeza ku byambu bya Iran. Iri gota (blockade) rigamije gukumira amato yose yinjira cyangwa asohoka muri Iran, mu rwego rwo kuyihatira gufungura umuhora wa Hormuz.

Ingingo z’ingenzi kuri iki cyemezo:

• Intego ya Trump: Amerika irashaka ko Iran yongera gufungura inzira ya Hormuz, inyuramo hafi 1/5 (20%) by’amavuta na gaz bikoreshwa ku isi yose.

• Ubusugire bwa Iran: Ambasaderi wa Iran muri Loni, Amir Saeid Iravani, yamaganye iki gikorwa avuga ko ari "ukuvogera ubusugire" bw’igihugu cye kandi ko bishyira amahoro y’isi mu kaga gakomeye.

• Agahenge: Nubwo hari agahenge k’ibyumweru bibiri kazarangira ku wa 22 Mata 2026, kuba ibiganiro bya Pakistan ntacyo byagezeho bituma iminsi isigaye iba iy’icyoba n’ishyamirane rikomeye mu nyanja.

Isesengura rya Inganjinews: "Iminsi 8 isigaye mbere y’ihangana ryeruye"

Kuri twe muri uyu mwaka wa 2026, iki cyemezo cya Amerika kirerekana ko Trump akoresha uburyo bwo gusunikiraa umwanzi ku rukuta. Kugota ibyambu bivuze ko Iran itazashobora kohereza peteroli yayo mu mahanga cyangwa kwinjiza ibikoresho by’ingenzi, ibintu bishobora guhungabanya ubutegetsi bwa Mojtaba Khamenei busanzwe bufite ibikomere by’intambara.

Icyakora, ubu buryo bufite ibyago bibiri bikomeye:

1. Gutumbagira kwa Peteroli: Niba Iran yinangiye ntifungure Hormuz, kandi Amerika ikomeje kugota ibyambu byayo, ibiciro bya peteroli bishobora kurenga 120$ mu minsi mike iri mberere, bikazahaza ubukungu bwa Afurika n’Uburayi.

2. Imirwano mu Nyanja: Kuba Iran yavuze ko ubwato bwose buzasatira Hormuz buzaraswa, bivuze ko mu gihe Amerika yaba ikomeje kwisunika, dushobora kubona imirwano yeruye mu nyanja mbere y’uko agahenge karangira ku wa 22 Mata.

 GENÈVE: Ibiganiro hagati ya AFC/M23 na Leta ya Kinshasa byatangiye mu muhezo