Kenya n’u Rwanda byasabwe n'abaharanira uburenganzira bwa muntu gukora iperereza ku ibura rya Gasana

Yantemye itako ashaka nkunkuraho igitsina ngo ntazasubira gusambana.

Umuryango mpuzamahanga urahamagarira guverinoma za Kenya n’u Rwanda gutanga amakuru ajyanye n’aho Yusuf Gasana, uharanira uburenganzira bwa muntu bivugwa ko yabuze, aherereye.

Gasana, bivugwa ko azwi cyane mu guharanira uburenganzira bwa muntu mu Rwanda, bivugwa ko yashimutiwe iwe i Nairobi ku wa 20 Gicurasi 2023 n’abantu batamenyekanye.

Intumwa idasanzwe y’Umuryango w’Abibumbye ishinzwe amakuru ku baharanira uburenganzira bwa muntu, Mary Lawlor, mu itangazo rye ku wa Kane yavuze ko icyo gushimuta no kurigisa ku gahato bikekwa ko byakozwe n’intumwa za Leta.

Lawlor yagize ati: "Nandikiye Guverinoma ya Kenya n’u Rwanda kugira ngo mbone amakuru yihutirwa ku byerekeye irengero rye, aho aherereye n’imibereho ye."

Ati: "Umuryango wa Gasana ukeneye ibisubizo by’abayobozi ba Kenya, bagomba guhita bakora iperereza ku byabaye kandi bakagaragaza irengero rye n’aho aherereye".

Gasana ni umunyamuryango w’umuryango w’impunzi ukorera i Nairobi.

Uyu muryango uvuga ko urwanya gucyura impunzi z’Abanyarwanda zitabishaka nk’uko iyi nkuru dukesha ikinyamakuru The Star cyo muri Kenya ivuga.

Nk’uko Lawlor abitangaza, ngo nubwo umuryango wa Gasana washyizeho umwete wo gushaka ibisubizo ku bayobozi ba Kenya, nta gisubizo gifatika cyabonetse.

Yakomeje avuga ko Itsinda ry’Umuryango w’Abibumbye ryita ku kubura ku gahato cyangwa ku bitari ku bushake ryagejeje ikibazo cye kuri Guverinoma ya Kenya.

Yavuze ko hagati ya Nzeri 2023 na Werurwe 2024, umuryango wa Gasana wumvise amakuru adasanzwe ko afungiye muri gereza yo mu Rwanda hamwe n’abandi bantu benshi batarashinjwa.

Yavuze ko bivugwa ko Gasana ashobora kuba yararebwe nabi kubera kuvuga ko u Rwanda ari igihugu kidafite umutekano ku bashaka gutaha.

Lawlor yagize ati: "Biteye impungenge cyane cyane ko abantu batazwi bashimuse Gasana mu rugo rwe ku gahato bakekwaho kuba ari abakozi ba Leta ya Kenya."

Lawlor yashimangiye ko ibihugu byombi bigengwa n’amategeko mpuzamahanga arengera uburenganzira bwa muntu, cyane cyane Itangazo ku kurinda abantu bose kubura ku gahato.

Yavuze ko muri urwo rwego, ibihugu byombi bifite inshingano zo gukora iperereza ryihuse, gushakisha umuntu waburiwe irengero no kubiryoza ababikoze.